શરૂઆત-૨ | હિન્દૂ ધર્મગ્રંથોમાં કચરો લખ્યો છે

હું છેલ્લા એક વર્ષથી ફેસબુક પર લખું છું કે, “હિંદુ ધર્મ નહિ, અધર્મ છે. મુઠ્ઠીભર લોકોની નીચ રાજનીતિ છે.”

આમાં, ચાર બાબતો પર મેં ભાર આપ્યો છે. (૧) હિંદુ ધર્મ નથી. (૨) હિંદુ ધર્મના નામે અધર્મ છે. (૩) હિંદુ રાજનીતિ છે. અને (૪) રાજનીતિમાં પણ “નીચ રાજનીતિ”નો પ્રકાર છે.

અને આ જ બાબતે આ વર્ષના અંતમાં કે 2021ની શરૂઆમાં એક પુસ્તક લખવાનો પણ વિચાર કર્યો હતો. જેમાં હિંદુ શબ્દની ઉત્પત્તિ, મારી મચેડીને ધર્મ કેવી રીતે બનાવવામાં આવ્યો, ધર્મના નામે મુઠ્ઠીભર લોકોએ કેવી રીતે બહુમત લોકોનું શોષણ કર્યું, સમય સમય પર કેવી રીતે સુધારા વધારા કર્યા, વૈદિક સમયમાં એ લોકો શુ કરતા હતા અને આજે શુ કરે છે, બૌદ્ધો અને વૈદીકો વચ્ચેનો સંઘર્ષ, હિંદુ ધર્મમાં ગણાતા સંપ્રદાયો વચ્ચેનો સંઘર્ષ, હિંદુ ધર્મમાં ગણાતા સંપ્રદાયો વિશે માહિતી, આ બધ્ધુ જ આવરી લેવાનો હતો.

તદુપરાંત,
આ ધર્મ ગ્રંથો આજે પણ આખા દેશને કેવી રીતે નડી રહ્યા છે, ભારતીય સમાજ પર કેવી કેવી ભયાનક અસરો પાડે છે, ભારતીય સમાજ પર પડનારી સામાજિક, રાજકીય, ધાર્મિક, આર્થિક અને શૈક્ષણીક અસરો અને એ પણ આજના સંદર્ભમાં, એ પણ હું જોડે જોડે લખવાનો હતો.

આજે છેલ્લા થોડા દિવસમાં જે પરિસ્થિતિ ઉભી થઈ છે અને રોજ એક આર્ટિકલ લખવાની જરૂરિયાત ઉભી થઈ છે, તે જોતા “હિંદુ રાજનીતિ” ના ઉપરોક્ત વિષયને આપણે આ આર્ટિકલોમાં આવરી લઈશું.

હવે,
આ પુસ્તક નથી પણ આર્ટિકલોની સિરીઝ છે એટલે પુસ્તકમાં જેમ એક પછી એક, તબક્કાવાર વિષય સમજાવવામાં આવે, અનુક્રમણિકા મુજબ લખાય, તેમ આ આર્ટિકલ સિરીઝમાં થઈ શકશે નહીં. સાથે સાથે ઘણી વાર સાંપ્રત સમયમાં બનતી ઘટનાઓને ધ્યાનમાં લઈને આર્ટિકલ લખીશું કે જેથી વાચક સરળતાથી વિષય-વસ્તુ સમજી શકે, તે માટે પણ આપણે અનુક્રમણિકાનું પાલન કરી શકીએ તેમ નથી.

આપણે પ્રયત્ન કરીશું કે,
આર્ટિકલોની સળંગતતા (continuity) જળવાઈ રહે પણ આ તબક્કે હું કોઈ ખાતરી આપી શકું તેમ નથી. એટલું નક્કી કે ઉપર જણાવ્યા મુજબના બધા જ વિષયો આપણે ચોક્કસ આવરી લઈશું. જ્યારે પૂરતા પ્રમાણમાં આર્ટિકલ થઈ જશે ત્યારે તેને અનુક્રમણિકા મુજબ ગોઠવીને આપણે પુસ્તક રૂપે ચોક્કસ પ્રકાશિત કરીશું.

અમુક લોકો મુસ્લિમો વિરુદ્ધ હિંદુઓને ભડકાવવા બાબાસાહેબના ગ્રંથ “પાકિસ્તાન અથવા હિંદના ભાગલા” Thoughts On Pakistan નો ભરપૂર દુરુપયોગ કરે છે પણ એ જ ગ્રંથમાં લખેલી આ વાત તમને જણાવતા નથી. જે આજના અઘોષિત ઈમરજન્સીના સમયમાં ખૂબ જ લાગુ પડે છે. બાબાસાહેબે શુ લખ્યું છે તે વાંચો.

“If Hindu Raj does become a fact, it will, no doubt, be the greatest calamity for this country. No matter what the Hindus say. Hinduism is a menace to liberty, equality and fraternity. On that account it is incompatible with democracy. Hindu Raj must be prevented at any cost.”

Dr. Babasaheb Ambedkar Volume No. 8, Page No. 358

Source

ગુજરાતી અનુવાદ:

“જો હિંદુરાજ હકીકત બને તો નિઃશંક તે આ દેશની મોટામાં મોટી આપત્તિ હશે. હિંદુઓ ગમે તે કહે પણ હિંદુ ધર્મ સ્વતંત્રતા, સમાનતા અને બંધુતા માટે જોખમકારક છે. તેથી જ તે લોકશાહી સાથે મેળ ખાતો નથી. કોઈપણ હિસાબે હિંદુરાજ રોકવું જોઈએ.”

તમે અંદાજ લગાવો કે બાબાસાહેબ કેટલા દૂરદ્રષ્ટિ ધરાવનાર મહામાનવ હતા. આજે જ્યારે દેશમાં હિંદુ, હિંદુત્વ, હિંદુરાષ્ટ્રના નામે ઉન્માદ ચરમ સીમા પર છે ત્યારે, આ વિષય પર હું પુરી ગંભીરતા સાથે લખવાનો છું. અને ભવિષ્યમાં આવનાર દરેક મુશ્કેલીનો સામનો કરવા તૈયાર છું.

હું લખતો રહીશ,
તમે વાંચતા રહેજો,
સ્પ્રેડ કરતાં રહેજો,
અને આ મુદ્દાઓને અન્ય લોકો સાથે ચર્ચા પણ કરજો.

આપ લોકો રોજ વાંચો, વિચારો અને અન્યોને ફોરવર્ડ કરો, એ જ મારા માટે શ્રેષ્ઠ મદદ છે, એમ સમજી વધુમાં વધુ લોકો સુધી મારા વિચારો પહોંચાડજો.

આ સાથે પ્રસ્તાવના પુરી કરીએ છીએ અને આવતી કાલથી તમને પહેલો આર્ટિકલ વાંચવા મળશે.

તારીખ: ૦૫/૦૬/૨૦૨૦

જય ભીમ જય ભારત

✍️ કૌશિક શરૂઆત

અગાઉનો આર્ટિકલ વાંચવા અહીં ક્લિક કરો.